MOKABAT sa kapin P96 million pesos ang kinatibuk-ang gitunol sa Philhealth Region 10 sa kagamhanang lokal sa Cagayan de Oro isip reimbursements sa pagpahigayon og Philhealth Konsultasyong Sulit at Tama (KonSulTa) activities sa tuig 2024 sa tanang mga lehitimong KonSulTa providers sa Cagayan de Oro.

 

Gihimo ang ceremonial turnover sa tseke karong adlawa, Pebrero 24, 2025 atol sa flagraising ceremony sa city hall quadrangle.

 

Sigon ni Mr. Marlon Niño S. Arrabaca, Chief Social Insurance Officer sa Philhealth Cagayan de Oro, nga ang maong turnover sa reimbursement kabahin usab sa kasaulogan sa National Health Insurance Month karong Pebrero ug 30th anniversary sa Philhealth.

 

Ang KonSulTa activities naglangkob sa onsite Philhealth mass registration, first patient encounter ug profiling nga ginapahigayon usab matag Klarex nga Serbisyo sa Baryo ug Suroy-Suroy sa Baryo: Klarex nga Serbisyo sa Panlawas nga programa sa administrasyon ni Mayor Rolando Klarex Uy.

 

Kini agi’g pagtuman sa pagpakusog sa Universal Health Care Law sa nasod.

 

Lakip misaksi sa turnover si Ms. Maria Rhodella S. Monsanto, chief field operations division, Philhealth - 10, Mr. Abdul Obedi S. Alip, Social Insurance Officer III, Philhealth CDO ug Ms. Hazel B. Lañas, fiscal controller, Philhealth CDO. (AGP/Photos by Reynan Baylin/CIO)