MILAGDA og kasabutan ang Northern Mindanao Medical Center (NMMC)-Department of Pediatric Community Outreach Program ug LGU-CDO alang sa libre’ng medical services sa mga gagmay’ng kabataan nga nagtungha sa Child Development Centers.

 

Ang Memorandum of Agreement (MOA) gilagdaan ni City Administrator Atty. Roy Hilario Raagas nga mao’y mirepresentar kang Mayor Klarex Uy uban ni City Social Welfare and Development Department Officer Annie Tongson ingon man ang NMMC-Department of Pediatric Community Outreach Program nga girepresentar ni Dr Joseph Chrysler Beja, NMMC Head of Professional Training Research Unit uban ni NMMC Department of Pediatrics Chair Dr. Kathryn Ruby C. Lagunilla.

 

Sa maong MOA, ang mga gagmay’ng kabataan makadawat sa libreng check-up, diin ang matumbok nga problema sa panlawas nga pwedeng maka-apekto sa ‘brain development’ ug ‘physical growth’ sa bata i-monitor ug hatagan og intervention sa mga doctor lakip resident intern doctor.

 

Nasayrang ang pilot barangay sa maong project ang Barangay Carmen.

 

Tumong sa maong partnership ang mahatagan og insaktong pag-atiman sa ‘health’ sa mga gagmay’ng kabataan subay sa Early Childhood Care and Development (ECCD) Checklist. (NLB/CIO/photos by Roel Felicitas/CIO)