SA tinguha nga mausab ang panglantaw sa mga mag-uuma nga mahimong usa ka negosyo ang pagpanguma, nagpahigayon og Agroenterprise Clustering Approach (AECA) orientation, ug Record Keeping workshop ang Agricultural Productivity Operations Office (APOO) alang sa mga mag-uuma sa Cacao sa Salimbal Tignapoloan Cagayan San Isidro Community Farmers Association (STCSICFA).

 

Gipasabot ni APOO Dept. Manager Engr. Paterno Gonzales nga pinaag isa collective marketing ug market-driven nga production sa cacao makakat-on og mga pamaagi ang mga mag-uuma aron mahimong mga agro-entrepreneur.

 

Tumong usab sa maong training nga matabangan ang mga mag-uuma sa STCSICFA nga masiguro ang hapsay ug epektibo nga pagpamaligya pinaagi sa sakto nga pagrekord sa ilang mga transaksyon.

 

Sa kasamtangan direkta nga nakig-partner ang mga mag-uuma sa “Pagmaya”, usa ka local business nga tighimo og tsokolate ning syudad nga nakahatag og dakong tabang sa panginabuhi ug income sa mga cacao farmers.

 

Samtang padayon nga nagsuporta ang APOO sa mga mag-uuma pinaagi sa pag-monitor ug paghatag sa nagkadaiyang capacity development trainings.

 

Ang administrasyon ni Mayor Rolando `Klarex’ Uy hugot nga nagasuporta sa mga lokal nga mag-uuma pinaagi sa nagkadaiyang pamaagi aron molambo ang ilang kahibalo ug abilidad aron mouswag sa agro-enterprise ug sa ingon mosaka ang ilang income. (ALR/CIO/Photos from APOO)