Migulang kampeon ang Cluster E Blue Raven sa pinakaunang cheerdance competition nga gipasiugdahan sa City Education and Development Office alayon sa ‘Scholars’ Cup’ nga gipahigayon Marso 29 ug 30 diha sa Xavier University - Ateneo de Cagayan Gymnasium.

 

Nadawat sa kampeon ang plaque of recognition ug cash prize balor P20,000. Ang 1st placer mao ang Cluster F Yellow Falcons, diin nakadawat kini og plaque of recognition ug P15,000 cash prize, samtang 2nd placer ang Cluster A Red Dragons, diin plaque of recognition ug P10,000 cash prize ang nadawat.

 

Sa special awards, naangkon sa Cluster F Yellow Falcons ang ‘Best in Routine’ ug ‘Best in Costume and Props’ ang Cluster E Blue Raven.

 

Nasayrang ang maong cheerdance competition gisalmotan sa pito ka clusters nga gilangkoban sa mga city scholars gikan sa nagkadaiyang tunghaan ug barangay sa tuyo nga mabaid ang karakter sa mga city scholars dili lamang sa eskwelahan kondili apil sa natad sa paugnat sa kusog.

 

Gani, mapasalamaton si CEDO Department Manager Richel Petalcurin-Dahay kang Committee on Education Chairperson City Councilor Suzette Magtajas-Daba kinsa midugang sa cash prizes, ug Sangguniang Kabataan Federation President Kenneth John Sacala kinsa maoy sponsor sa mga medals ug plaques. (Text and photos by Nica Borja and Alixes Gemao/CIO)