Mapahimuslan sa mga residente sa Barangay Besigan ug kasikbit nga mga lugar ang mga batakang serbisyo nga libreng itunol sa nagkadaiyang buhatan ug departamento sa city hall atol sa “Klarex nga Serbisyo sa Baryo” nga pangulohan mismo ni Mayor Klarex Uy karong umaabot Sabado, Abril 5 ning tuig.

 

Tipik sa mga libreng serbisyo nga matagamtaman sa mga molupyo sa Besigan mao ang paghiling sa balatian kon medical check-up, ibot sa ngipon, eye screening, tambal ug medisina.

 

Paglukat sa mga dokumento sama sa business permit, cedula, electrical, building permit, pagbakuna sa mga hayop, paghatag og mga binhi sa prutas ug utan, pagrehistro sa pagkatawo, masahe, alot ug daghan pang uban.

 

Tumong sa KSB, ang one-stop community outreach program ni Mayor Klarex, nga mapaduol ang gobyerno ngadto sa katawhan ug ang katawhan mapaduol ngadto sa gobyerno. (CIO)