Sa tinguha nga matabangan ug maserbisyohan ang mga mag-uuma, gihingusgan sa administrasyon ni Mayor Rolando `Klarex’ Uy nga makabaton og bag-ong kagamitan sa agrikultura ang syudad pinaagi sa City Agriculture Office.

 

Gani, usa ka blessing ceremony alang sa maong mga agricultural equipment ang gipahigayon Martes, Abril 15, 2025, nga gitambongan nila ni City Councilors Jay Roa Pascual, chairman sa committee on agriculture, ug Suzette Magtajas-Daba, City Administrator Atty. Roy Hilario Raagas, City Agriculturist Engr. Paterno Gonzales, ug pipila ka department managers sa city hall.

 

Ang mga ekipo naglangkob sa hand tractor multi-cultivator, mini hydraulic excavator, 4WD farm tractor with implements, geo-resistivity survey equipment, total station ug DJI Mavic 3 multispectral drone with RTK.

 

Gipasabot ni Engr. Gonzales nga kini nga mga agricultural equipment mahimong hulamon sa mga asosasyon sa mga mag-uuma kung nagkinahanglan sila alang sa ilang kaumahan.

 

Alayon niini, gipasalamatan ni Engr. Gonzales si Mayor Klarex ug ang 20th City Council sa pagpangulo ni Vice Mayor Jocelyn Rodriguez sa hugot nga suporta sa ilang buhatan. (ALR/CIO/Photos by Reynan Baylin/CIO)