Wednesday, 16 April 2025 17:36

PAGPALAPAD SA KAHIBALO KALABOT SA ‘HALAL ORDINANCE’ GIHIMO SA NCMF

Written by AGP
MALAMPUSONG gipahigayon sa National Commission on Muslim Filipinos Northern Mindanao (NCMF) ang seminar kabahin sa Halal Awareness Program nga gitambongan sa mga miyembro sa Regulatory Compliance Board sa pagpanguna ni RCB chairman Atty. Jose Edgardo Uy, kauban ang ubang stakeholders, Abril 15, 2025 sa usa ka hotel ning syudad.
 
Atol sa programa, gipasalamatan ni NCMF 10 Regional Director Abdulnasser P. Masorong ang kagamhanang lokal ilabina ang 20th City Council sa suporta human napalabang ang City Ordinance 14477-2023 kon ‘Halal Ordinance of Cagayan de Oro’.
 
Laraw sa nasangpit nga seminar nga komprehensibong ma-edukar ang mga partisipante kabahin sa ordinansa, fundamentals of Halal, ingon man ang Philippine Halal Standard.
 
Dumduman niadtong tuig 2023 napalabang ang maong ordinansa diin nalatid nga mahimong Halal Task Force ang RCB, ug gisukip nga mahimong regular nga miyembro usab sa task force ang Regional Director sa NCMF 10.
 
Lakip sa tinguha mao ang pag-promote ug pag-regulate sa Halal industries, pagpakusog sa maayong relasyon tali Muslim-Kristiyano pinaagi sa pagtahod sa kultura, pagmugna og trabaho ug economic opportunities ug sa hingpit makagama og standards alang sa Halal services and goods. (AGP/Photos by Kim Zaldivar/CIO)