Gisiguro sa meat division sa City Veterinary Office nga luwas kan-on sa publiko ang gibaligya nga mga karne, lakip lechon sa nagkadaiyang parte sa syudad, ilabina sa mga beach resorts ning panahon sa Domingo sa Pagkabanhaw kon Easter Sunday.

 

Kini human nagpahigayon og post-abbatoir inspection ang maong buhatan aron pagsusi kung nakabaton ba ang mga mamaligyaay sa karne ug lechon og Meat Inspection Certificate kon MIC.

 

Gibutyag ni City Veterinarian Dr Helen Ann Tacandong nga lakip sa gisusi sa mga meat inspectors ang nagkadaiyang beach resorts sa syudad, ilabina ang Raagas beach resort human nakadawat og taho ang buhatan nga adunay gapamaligya sa maong dapit og lechon nga gikarga sa multicab nga walay MIC.

 

Hinoon, gidayeg ni Dr Tacandong ang mga mamaligyaay sa karne ug lechon nga misanong sa paglukat og MIC tungod kay walay lain gilantaw ang ilang buhatan kondili ang pagsiguro sa 'public health and safety' sa mga konsumidor. (CIO/photos by City Vet)