Mokabat na sa 233 ka mga proyektong inprastraktura balor og kapin P1.24 bilyones ang nakompleto sa administrasyon ni City Mayor Rolando ‘Klarex’ Uy sukad sa iyang paglingkod sa katungdanan niadtong Hunyo 30, 2022.

 

Kini ang unod sa Physical Accomplishment Report for Completed Projects of the City Government of Cagayan de Oro as of March 31, 2025 nga giandam sa buhatan ni City Engineer Joel V. Momongan.

 

Sulod sa duha ka tuig ug siyam ka bulan sa unang termino ni Mayor Klarex, 68 ka flood mitigation structures and drainage projects nga mobalor sa P425.6 milyones ang nahuman sa kasamtangang administrasyon.

 

Samtang 64 usab ka road concreting, opening, reblocking and widening projects balor og P298.7 milyones ang natapos sa syudad, lakip ang upat ka water system projects balor P18.1 milyones ug school building project balor P5 milyones.

 

Mokabat usab sa 95 ka nagkadaiyang proyektong inprastraktura balor og P490.7 milyones ang natibawas sa kagamhanan ning syudad. Kini naglakip na sa office repair and renovations, barangay hall and multipurpose buildings construction, child dev’t centers’ and perimeter fence construction, ug daghan pang uban.

 

Malaumon si Engr. Momongan nga madugangan pa ang ihap sa mga proyekto nga nahuman, sanglit daghan pang mga proyekto ubos sa administrasyon ni Mayor Klarex ang nagpadayon pa ang implementasyon karong panahona. (CIO)