Sa pagtapos sa World Immunization Week karong adlawa, Abril 30, nagpahigayon og libre’ng pagpamakuna ang City Health Office (CHO) ug Department of Health (DOH) sa Brgy. Lapasan Covered Court aron ipakita ang kamahinungdanon sa bakuna sa pagluwas og kinabuhi.

 

Ang World Immunization Week gisaulog matag katapusang semana sa Abril, diin gipahinumdoman pag-usab ang katawhan sa kahinungdanon sa bakuna aron makaangkon og himsog nga panlawas.

 

“Ang pagpabakuna usa sa labing malampuson ug cost-effective nga paagi sa public health intervention. Tungod sa bakuna, daghang sakit ug kakulian ang napugngan. Mao nga ania kamo karon, mga ginikanan, tungod kay inyong gihunahuna ang kaayohan sa inyong mga anak” saysay ni City Health Officer Dr. Rachel D. Dilla.

 

Lakip sa mga gitanyag nga bakuna ang: Routine Immunization Vaccines (RIV), Human Papillomavirus (HPV) alang sa mga Grade 4 o 9-14 anyos, Pneumococcal Vaccines para sa mga senior citizens, Measles Rubella (MR)/Tetanus Diphtheria (TD) para sa Grade 1 ug Grade 7, ug Tetanus Diphtheria (TD) para sa mga pregnant women.

 

Dugang pa, ang mga makakumpleto sa ilang bakuna makadawat og lima (5) ka kilo nga bugas gikan sa kagamhanang lokal sa pangulo ni Mayor Klarex Uy.

 

Ang tema karong tuiga nga 'BAKUNA SA TANAN, KAYANG-KAYA' nagpasabot sa tinguha ni Mayor Klarex nga masiguro nga ang matag tawo, bisan asa pa sila o unsay ilang kahimtang, mahimong makadawat sa mga bakunang makaluwas sa kinabuhi. (MDS/CIO/PHOTOS BY: KIM ZALDIVAR/CIO)