NAGKADAIYANG mga isyu ug kabalaka ang gipadangat sa mga opisyales sa Cogon United Market Vendors Association (CUMVA) sa Cogon Market ngadto kang Mayor Rolando `Klarex’ Uy atol sa ilang pagbisita sa mayor’s office Martes, Abril 29, 2025.

 

Usa sa ilang gihangyo mao nga maabrihan ang portion sa dalan JR Borja nga gisirado aron mobalik na ang ilang mga suki pagpamalit sa ilang tindahan sukad kini gisirado.

 

Apan gipasabot sila ni Mayor Klarex nga ang seguridad sa katawhan ang gilantaw sa pagsirado sa maong bahin nga dalan sa JR Borja aron dili sila motabok bisan asa.

 

“Bisan gibabagan na og pisi mosuong pa man gani nga dili gayud angay buhaton,” dugang ni Mayor Klarex.

 

Samtang giaghat sa mayor ang mga opisyales sa CUMVA nga gipangulohan sa ilang presidenti nga si Engr. Franklin Dagcuta nga isulat ang uban pa nilang mga hangyo aron mahatagan og aksyon kay sa kadaghan sa ilang gipadangat dili ang tanan matiman-an ni Mayor Klarex.

 

Nunot niini, dako ang pagpasalamat sa CUMVA officials kang Mayor Klarex sa paghatag og panahon kanila aron paminawon ang ilang mga hangyo. (ALR/CIO/Photos by Reynan Baylin/CIO)