HINGPIT na ang pagpangandam sa kagamhanan ning syudad alayon sa kasaulogan sa ika-75 ka tuig kon Diamond Jubilee sa pagkahimugso sa dakbayan sa Cagayan de Oro isip usa ka chartered city.

 

Kini human gimugna ni Mayor Klarex Uy pinaagi sa Executive Order No. 2025-0164 ang usa ka komitiba nga gitahasan sa paghan-ay sa mga kalihukan alang sa maong katuyoan nga magsugod karong bulan sa Mayo hangtud sa tibook bulan sa kapistahan sa Cagayan de Oro karong Agosto.

 

Mismo si Mayor Klarex Uy ang nangulo sa CDO@75 Organizing and Coordination Committee isip chairperson, uban ni City Administrator Atty. Roy Hilario Raagas, co-chairperson; ug City Mayor Chief of Staff Sheila Lumbatan isip vice chairperson.

 

Sa usa ka tigom kagahapong adlawa nga gidumala ni Atty. Raagas ug gitambongan sa mga departamento ug opisina sa city hall ug ubang mga ahensya sa gobyerno, gisugyot ang nagkadaiyang mga aktibidades nga gipahaom sa maong selebrasyon.

 

Opisyal nga nadeklarar ang Cagayan de Oro isip usa ka chartered city kaniadtong Hunyo 15, 1950 pinasikad sa Republic Act No. 521 nga gipangamahanan ni kanhi Congressman Emmanuel Pelaez sa Misamis Oriental ug nahimong balaod human gipirmahan ni kanhi Presidente Elpidio Quirino. (CIO)