GIILA sa Philippine Statistics Authority (PSA) ang syudad sa Cagayan de Oro ubos sa liderato ni City Mayor Rolando ‘Klarex’ Uy isip ikaduhang highly urbanized city sa tibook nasud nga adunay pinakataas nga basic literacy rate basi sa resulta sa 2024 Functional Literacy, Education, and Mass Media Survey kon FLEMMS nga gipagula sa ahensya bag-ohay lamang.

 

Ang dakbayan nakaangkon og basic literacy rate nga 96.1 porsiyento sa FLEMMS survey.

 

Ang ‘basic literacy’ mao ang kahibalo sa usa ka tawo sa pagbasa, pagsulat og yano nga mensahe nga masabtan, ug pagbuhat sa sayon nga mga kwentada sa matematika.

 

Gawas sa basic literacy, ang syudad nahimo usab nga Top 9 highly urbanized cities sa nasud nga adunay pinakataas nga functional literacy human nakaangkon og 84.4 porsiyento nga rating.

 

Ang ‘functional literacy’ mao ang mas taas nga lebel sa pagsabot, sama sa paghiusa sa duha o labaw pa nga impormasyon ug paghimo og konklusyon basi sa gihatag nga kasayuran. (CIO)