MALAMPUSONG gibuksan ang Grand Ease of Doing Business (EODB) Fair kon usa ka adlaw nga one-stop-shop fair sa Cagayan de Oro, Mayo 30, diha sa City Tourism Hall, ning siyudad.

 

Ang EODB fair gisalmotan sa 30 ka buhatan sa city hall ug national government agencies.

 

Lakip sa mga serbisyo’ng gitanyag sa maong fair ang pag-isyu sa bag-o ug renewed business permits, tax clearance, pagkolekta sa mga buhis, pag-isyu og bag-o ug renewed sanitary permit, building permit, zoning clearance for business permit, pag-notaryo sa mga dokumento ug uban pa.

 

Anaa usab ang mga serbisyo gikan sa national government agencies sama sa pag-enrol og e-card sa GSIS ug SSS, pag-register sa Pag-ibig, PhilHealth, pag-apply og loan sa Pag-ibig, Landbank, pag-isyu og birth certificate, marriage certificate, national ID, pag-enlist sa libreng Theoretical Driving Courses sa LTO ug uban pa.

 

Sa laing bahin, anaa usab ang Lazada pinaagi sa ilang programa nga Communitours diin ang mga business owners gitudloan unsaon pagpaninda sa Lazada.

 

Lakip sa misalmot sa pagbukas niini sila si City Administrator Atty. Roy Hilario Raagas kinsa mi-representar ni Mayor ‘Klarex’ Uy, Committee on Trade and Commerce Chairperson City Councilor George Goking, City Indigenous Mandatory Representative City Councilor Roberto ‘Datu Makilala’ Cabaring, City Councilor Roger Abaday, Oro Trade and Investment Promotions (Oro-TIPC) Chief John Asuncion, Cagayan de Oro Chamber of Commerce and Industry Foundation, Inc. President Engr. Almarco Brito, Cagayan de Oro City Filipino - Chinese Community Chairman Efren Uy, Anti-Red Tape Authority (ARTA) Director General Secretary Ernesto Perez, ARTA Northern Mindanao Regional Chief Dr. Jutchel Nayra, Lazada Philippines Head of Strategic Partnerships Hernan Mayhay ug uban pa.

 

Ang Grand EODB fair kabahin sa kasaulogan sa EODB month nga gasaulogon matag bulan sa Mayo. Kini inisyatiba sa LGU-CDO pinaagi sa Oro- Trade Investment and Promotions Center (Oro-TIPC), Anti Red-Tape Authority kon ARTA ug Lazada kansang tumong ang mapaduol sa katawhan ang mga serbisyo sa gobyerno ug mapabati kanila ang paspas ug sayon nga mga serbisyo. (NLB/CIO/ photos by Jomar Figuracion/CIO)