PORMAL nang gibuksan ang NEST (Nurturing Emphatic Support and Treatment) Wellness Hub, usa ka primary HIV (human immunodeficiency virus) treatment hub nga nahimutang sa City Health Office, dungan sa paghandom sa International AIDS Candlelight Memorial and Mobilization, karong adlawa Mayo 30, 2025.

 

Ang kalihokan gisalmotan sa nagkadaiyang ahensya sa gobyerno, stakeholders, mga partner organizations ug mga indibidwal.

 

Sa mensahe ni City Councilor Maria Lourdes S. Gaane, Vice Chairperson sa City AIDS Council, gipasabot niini nga labaw sa paghandom sa mga kinabuhi nga nawala gumikan sa sakit nga HIV ug AIDS, mahinungdanon usab ang padayon nga pagpalapad ug pagpakusog sa kampanya batok sa sakit pinaagi sa pag-edukar, testing, ug paghatag suporta sa mga PLHIV kon people living with HIV.

 

Sa iyang bahin, si City Health Officer Dr. Rachel Daba-Dilla, nagalaom nga pinaagi sa lapad nga pag-edukar sa katawhan mamenusan ang ‘stigma’ ug diskriminasyon batok sa mga tawong naghambin sa HIV/AIDS.

 

Mapasalamaton si Dr. Ronald A. Romano, physician & clinic manager sa NEST Wellness Hub sa makanunayong suporta sa administrasyon ni Mayor Rolando ‘Klarex’ Uy, Vice Mayor Jocelyn Bebot Rodriguez, ug 20th City Council, ug sa Local AIDS Council alang sa malampuson nga pagtanyag og one-stop-shop for STI & HIV prevention and treatment services.

 

Dumdoman nga naangkon sa NEST Wellness Hub ang certification gikan sa Department of Health Region 10 isip primary HIV treatment hub kaniadtong Abril 2, 2025. (AGP/Photos by Kim Zaldivar/CIO)