Unom ka mga pharmacy ning syudad ang gisusi ug gimonitor sa mga kadagkoan sa Department of Health (DOH-10), Department of Trade and Industry-Provincial Office (DTI-MisOr.), ug City Price Coordinating Council (CPCC) sa pagpanguna ni Atty. Jose Edgardo Uy, co-chairman sa CPCC, Biyernes Mayo 30, 2025.

 

Gisuta sa team kung nisunod ba sa suggested retail price (SRP) sa gitumbok nga mga tambal sama sa paracetamol, Vitamin C (Ascorbic), Losartan, insulin ug uban pa.

 

Lakip usab sa gitan-aw ang presyo ug supply sa face mask ug alcohol tungod sa pagtumaw sa MPox, hinoon wala pay natala nga kaso dinhi sa syudad ug wala pa gimando ang paggamit og face mask, apan gipadayag sa kadagkuan sa City Health Office nga katungod sa katawhan ang paggamit sa face mask alang sa ilang kasigurohan.

 

Tulo sa maong pharmacy ang nahimutang atubangan sa Northern Mindanao Medical Center (NMMC), samtang ang laing tulo anaa duol sa Cagayan de Oro Medical Center (COMC).

 

Nasayran nga duha sa tulo ka mga pharmacy atubangan sa NMMC ang giingong nag-overpricing sa kapin napulo ka mga tambal basi sa listahan sa DOH.

 

Alayon niini, giisyuhan sila og Letter of Inquiry (LOI) nga ilang tubagon ug mapasabot nganong wala sila nisunod sa SRP.

 

Miuban usab sa joint monitoring ang mga representante sa City Local Environment and Natural Resources Office (CLENRO), City Agriculture Office, Filipino-Chinese Chambers of Commerce, ug Kapisanan ng mga Brodkaster ng Pilipinas (KBP). (ALR/CIO/Photos by Reynan Baylin & Roel Feclicitas/CIO)