DOS mil uno (2,001) ka bag-ong nadawat nga city scholars gi-abiabi ni Mayor Klarex Uy, atol sa new scholars' assembly karong adlawa nga gipasiugdahan sa City Education and Development Office (CEDO) sa Capitol University Gymnasium, ning siyudad.

 

Atol sa assembly, gipahinumdoman ni Mayor Klarex nga dili sayangan ang maong scholarship ingon man kini usa ka talagsaon nga higayun.

 

“Kani nga scholarship program libre nga gihatag kaninyo sa gobyerno. Hinaut inyo kining tagaan og dako kaayo nga bili kay ang panahon moagi lang ninyo kung dili ninyo ampingan. Kining mga higayun bunga sa inyong paningkamot, sa inyong mga sakripisyo ug apil na ang mga pag-ampo, gihatagan mo sa Ginoo sa higayun busa ayaw ninyo sayangi ug usiki ang maong higayon.”, saysay ni Mayor Klarex Uy.

 

Nasayrang ang mga bag-ong city scholar makadawat sa benefits sama sa libreng tuition, quarterly allowance ug formation programs.

 

Lakip sa partner academic institutions diin motungha ang mga city scholar mao ang Xavier University-Ateneo de Cagayan, Lourdes College, University of Science and Technology of Southern Philippines (USTP), Liceo de Cagayan University, PHINMA- Cagayan de Oro College, Capitol University, Pilgrim Christian College, Southern Philippines College ug STI College Cagayan de Oro, Golden Heritage Polytechnic College, Vineyard International Polytechnic College, Informatics Computer Institute-Cagayan de Oro Center, Inc ug City College of Cagayan de Oro. (NLB/CIO/photos by Roel Felicitas/CIO)