UBAY-UBAY nga mga proyekto alang sa pagpalambo sa super health centers ning syudad ang laumang matibawas sa ikaduhang termino ni Mayor Klarex Uy ubos sa Health Facilities Enhancement Program (HFEP) sa Department of Health (DOH).

 

Gani man, gibutyag ni City Health Officer Dr Rachel Dilla, atol sa Management Committee (ManCom) meeting, nga natibawas na ang Balubal Super Health Center lakip mga ekipo niini andam na usab kini sa paghatag og serbisyo.

 

Lakip sa mga super health centers nga padayong gitrabaho ang San Simon ug Kauswagan super health centers.

 

Naghulat na lamang usab sa Notice to Proceed ang Puerto Bagong Pilipinas Health Center ingon man Indahag Bagong Pilipinas Health Center, Macabalan, Baikingon, Pagatpat, Cugman, Gusa ug Taguanao Bagong Pilipinas Health Centers.

 

Mismo si Mayor Klarex ang nangulo sa ManCom diin gihangyo usab niya ang mga department managers sa ilang suporta ug kooperasyon diha sa paghatag og tiunay nga serbisyo sa katawhan. (ACM/CIO Photos Jun Canete)