GIPANGULOHAN ni City Mayor Rolando ‘Klarex’ Uy kauban ang 4th ID Philippine Army, Cagayan de Oro City Police Office, Bureau of Fire Protection, mga nagkadaiyang ahensya sa gobyerno, kabaranggayan ug mga organisasyon sa pagsaulog sa ika-75 nga kasumaran sa pagkahimugso isip chartered city sa Cagayan de Oro, Hunyo 15, diha sa Kiosko Kagawasan, Divisoria Plaza ning syudad.

 

Bitbit sa 75th Diamond Jubilee celebration sa pagkahimugso sa syudad mao ang tema: "Proud of our Roots, Bold in our Dreams" (Mapasigarbuhon sa Kagikan, Madasigon sa mga Damgo).

 

Dumduman niadtong Hunyo 15, 1950 pinasikad sa Republic Act 521 gideklara ang dakbayan sa Cagayan de Oro isip chartered city human gilagdaan ni kanhi Pangulo Elpidio Quirino.

 

Gipasalamatan ni Mayor Klarex ang tanan nga nahimong instrumento ug nagpaluyo sa maong deklarasyon ilabina nila kanhi Congressman Pedro S. Baculio ug ni Congressman Emmanuel Pelaez.

 

Atol sa programa gipasidunggan ang mga kabanay nila kanhi Cong. Baculio ug Pelaez, ingon man usab ang pamilya sa nagsilbing unang Mayor sa dakbayan kanhi Mayor Maximo Suniel, pamilya usab sa unang Bise Mayor Pedro Pimentel. Lakip gipasidunggan ang pamilya sa mga unang miyembro sa konseho; ang pamilya nila ni kanhi Konsehal Donato Esling, Pio Roa, Dr. Gerardo Sabal, Waldo Mc Vickers, Atty. Juan Regalado, Cesareo Sambaan, Alfredo Shapit ug Dr. Jesus Seriña kinsa nakasilbi usab isip Mayor ug Vice Mayor sa dakbayan.

 

Gidayeg usab ni Mayor Klarex ang pagtambong ni Kanhi Mayor Constantino 'Tinnex' Jaraula alang sa makasaysayanong programa. (AGP/Photos by Reynan Baylin/CIO)