MABULOKON ug sadya ang pagpahigayon sa Lechoneros Encuentros 3 bag-ohay lamang ubos sa administrasyon ni Mayor Rolando `Klarex’ Uy isip kabahin sa mga kalihokan sa kasaulogan sa ika-75th Charter Day sa Cagayan de Oro.

 

Mokabat 23 ka mga lechoneros ning syudad ang misalmot sa lechon festival nga gipasiugdahan sa City Veterinary Office inabagan sa BMEG San Miguel Foods Corporation, United Lechoneros of Cagayan de Oro City Association Inc. (ULCAI) ug Globe.

 

Ang mga midaog sa maong kalihokan ug giila nga CDO’s “Lechonero King” 2025 mao ang Mias and Nenen Lauron Lechon House nga nakadawat og premyo nga P30K ug dugang P3K gikan sa Globe.

 

Nakuha sa JanRay’s Lechon House ang ikaduhang dapit uban ang premyo nga P20K ug dugang P2K gikan sa Globe. Samtang ang Ramonal Lechon House mao ang nakakuha sa ikatulong dapit nga adunay premyo nga P10K ug dugang P1K gikan sa Globe.

 

Nakadawat og P3K ang 20 ka mga partisipante nga wala napili isip consolacion prize.

 

Nakadawat usab ang tanang partisipante og usa ka sako nga BMEG feeds.

 

Sa iyang mensahe gipasalamatan ni Mayor Klarex ang mga lechoneros nga misalmot sa maong kalihokan ug tungod sa kalipay iyang gipalit ang 23 ka mga lechon ug gipakaon sa mga tawo nga misaksi sa kalihokan.

 

Gipasalamatan usab niya ang mga sponsors nga misuporta sa kalihokan sa syudad hinungdan nga nagmalampuson kini.

 

Mipaabot usab sa iyang pasalamat si City Veterinarian Dr. Helen Ann Tacandong kang Mayor Klarex sa makanunayon nga pagsuporta sa kalihokan sa City Vet ug sa tanang mga sponsors. (ALR/CIO/Photos by Kim Zaldivar, Roel Felicitas & Jun Cañete/CIO)