GIPASIUGDA sa City Tourism and Cultural Affairs Office kauban si Vice Mayor Jocelyn ‘Bebot’ Rodriguez ang usa ka ‘MoTOURela’, cultural and heritage tour, sugod Hunyo 17 hangtod 19, isip kabahin sa kinatibuk-an nga pagsaulog sa ika-75 nga kasumaran sa pagkahimugso sa Cagayan de Oro kon Charter Day.

 

Laraw sa kagamhanang lokal ubos sa administrasyon ni Mayor Rolando ‘Klarex’ Uy, nga mahatagan og importansya ang pagduaw sa mga makasaysayanong lugar sa dakbayan sakay sa cultural icon nga ‘motorela’.

 

Kahinumdoman, ang motorized caratela kon ‘motorela’ orihinal nga gigama ug gidisenyo ni Mr. Rafael Floirendo niadtong tuig 1965 ug karon nahimo na nga public transportation.

 

Misalmot sa maong heritage tour ang faculty sa COC-PHINMA Hospitality and Tourism Management, COCPO Tourist Police Unit, City Information Office, Department of Tourism Region 10 ug Vice Mayor’s Office.

 

Lakip giadtoan sa grupo ang Duaw Park, St. Augustine Metropolitan Cathedral, City Hall Executive Building, Gaston Park, Water Tower nga nagsilbi karon nga City Museum, Macasandig Boulevard, Kagay-an bridge, Maharlika bridge, La Castilla Museum, Kiosko Kagawasan Divisoria Plaza ug Community Amphi Theater.(AGP/Photos by Kim Zaldivar/CIO)