NANAWAGAN si Dr. Ronald Romano, program coordinator sa Reproductive Health & Wellness Center – STD & HIV/AIDS Prevention and Control sa City Health Office ngadto sa mga tawo nga adunay ‘risky behavior’ o adunay multiple sexual partners ug nalambigit sa ‘repeated unprotected sexual activities’ nga boluntaryong isumite ang kaugalingon alang sa libre ug confidential nga HIV testing nga gitanyag sa kagamhanang lokal pinaagi sa NEST Wellness Hub sa City Health Office.

 

Gipasabot ni Dr. Romano, clinic manager sa NEST (Nurturing Emphatic Support & Treatment) Wellness Hub, usa ka ‘one-stop-shop for STI (sexually transmitted infection) & HIV (human immunodeficiency virus) prevention and treatment services’ nga gidumala sa syudad pinaagi sa hugot nga suporta ni Mayor Rolando ‘Klarex’ Uy, kinsa chairman sa Local Aids Council.

 

Ang NEST wellness hub, giila sa Department of Health isip CDO Primary HIV Treatment Hub, accredited usab sa Philhealth ug hugot nga nagasubay sa gabayan sa Republic Act 11166 kon Philippine HIV and AIDS Policy Act of 2018 aron masiguro ang privacy ug confidentiality sa mga tawo’ng nagapa-ubos sa testing, counselling & treatment batok HIV/AIDS.

 

Gawas sa HIV screening & confirmatory testing, ang Nest Wellness hub nagapahigayon usab og gram screening ug serologic testing alang sa sakit nga gonorrhea, chlamydia, syphilis ug uban pang klase sa STI/STDs.

 

Giawhag usab ni Dr. Romano nga likayan ang pagbiay-biay sa mga persons living with HIV kon (PLHIV) sanglit dako nga hinungdan ang ‘stigma ug diskriminasyon’ nga magpugong sa katawhan pag-adto sa mga clinic.

 

Giklaro niini nga samtang wala pa gihapon tambal aron hingpit nga mapakgang ang HIV, aduna matod pay ‘antiretroviral therapy’ nga makatabang sa pagpaubos sa HIV viral load sa tawong naghambin sa sakit, malikayan nga mapasa ang HIV sa ubang tawo , makahatag og dekalidad nga kinabuhi sa mga PLHIV ug dakong tsansa nga dili na mosangpot sa AIDS (acquired immunodeficiency syndrome) kon ang last clinical stage sa HIV. (AGP/CIO)