GIDAWAT sa 24 ka mga asosasyon sa mangingisda ang bag-ong mga fishing gears ug ekipo human kini pormal nga gitunol kanila sa syudad ubos sa administrasyon ni Mayor Rolando `Klarex’ Uy pinaagi sa Agricultural Productivity Office (APO), Huwebes Hunyo 26, 2025.

 

Ang maong mga asosasyon nagagikan sa Barangay Bugo, Puerto Agusan, Tablon, Cugman, Gusa, Lapasan, Macabalan, Bayabas, Puntod, Bonbon ug Bulua.

 

Si City Agriculturist Engr. Paterno Gonzales, mipasabot nga ang mga fishing gears kabahin sa award nga nadawat sa syudad sa Cagayan de Oro isip Regional winner sa Search for 2022 Outstanding Coastal Community: Malinis at Masaganang Karagatan (MMK) nga programa sa Bureau of Fisheries and Aquatic Resources (BFAR).

 

Kini nga programa nag-ila sa mga outstanding coastal barangays ug municipalities sa ilang paningkamot sa pagpanalipod ug pagkonserbar sa pagpangisda diin nakadawat og premyo nga P2 milyones ang syudad.

 

Gawas sa mga fishing gears ug ekipo, adunay mga trainings ug seminar nga himoon ang APO alang sa mga fisherfolk associations ug uban pa nga mga programa nga makapalambo sa ilang pagpangisda isip kabahin sa kantidad sa premyo nga nadawat.

 

Nunot niini, mipaabot sa ilang pasalamat ngadto kang Mayor Klarex ang mga benepisyaryo kay dako kini og matabang sa ilang matag adlaw nga panginabuhi sa kadagatan diin maayong kalidad nga mga isda ang ilang makuha. (ALR/CIO/Photos by Jun

Cañete/CIO)