TUNGOD sa padayon nga pagmagahi sa mga sidewalk vendors ug ambulant vendors sa pahimangno ug hangyo sa syudad nga dili mamaligya sa dalan J.R. Borja ug Capt. Vicente Roa padayon usab sa ilang clearing operation ang Night Market Management Committee hinungdan nga ubay-ubay nga mga paninda ug gamit sa pagpaninda ang gikonpiska sa mga personahi sa Road and Sidewalk Clearing Unit (RaSCU) uban sa kapulisan sa Cagayan de Oro City Police Office (Cocpo).

 

Ubay-ubay usab ka mga sakyanan, motorsiklo nga nag-illegal parking sa mga dalan palibot sa Cogon market ingon man trisikad ang na-isyuhan og citation ticket ug gi-impound sa mga personahi sa Roads and Traffic Administration (RTA).

 

Ang clearing operation gipangunahan nila ni RTA Acting Dep’t. Head Engr. Nonito Oclarit, ug Sean Molig, general manager sa City Economic Enterprises and Business Development Administration (CEEBDA).

 

Si Engr. Oclarit mipasabot nga sa matag adlaw nila nga operation kanunay usab nilang gihangyo ug gipasabot ang mga sidewalk vendors dili mamaligya sa mga dalan nga wala gitugot nga baligyaan.

 

Apan nagmagahi gihapon ang mga vendors hinungdan nga napugos ang mga enforcers pagkuha sa ilang mga baligya ug mga gamit.

 

Nasayran nga sukad mihangyo si Mayor Rolando `Klarex’ Uy sa mga kadagkuan sa CEEBDA, RTA, ug Night Market Team nga kinahanglan walay mamaligya sa gitumbok nga mga dalan matag adlaw nga nagpahigayon og clearing operation ang team.

 

Naglaum ug padayon nga naghangyo ang Night Market Team ngadto sa mga vendors nga mosunod sa balaod sa syudad ug gabayan sa Night Market aron dili maperhuwisyo ang publiko ug motorista ug labaw sa tanan dili usab masayang ang ilang paninda nga kuhaon sa mga enforcers.

(ALR/CIO/Photos from Night Market Management Committee)