ILAWOM sa CDO-RISE Agenda sa administrasyon ni Mayor Rolando `Klarex’ Uy diin hugot nga gisuportahan ang programa sa agrikultura, malampuson nga milusad og Farmers Field School (FFS) on Corn Production ang Agricultural Poductivity Operatons Office diha sa Barangay Indahag bag-ohay lang.

 

Kini nga kalihokan usa ka aktibong paningkamot sa syudad inabagan sa Agricultural Training Institute – Regional Training Center X (ATI-Northern Mindanao), ug sa Agricultural Productivity Operations Office (APOO) aron mapalambo ang produksyon sa agrikultura ug masiguro ang food security sa Cagayan de Oro.

 

Si City Agriculturist Engr. Paterno Gonzales, acting dep’t manager sa APOO namahayag nga ang 16-week Farmers Field School gisugdan niadtong bulan sa Hunyo hangtod sa Agosto.

 

Tumong niini nga mahatagan og kahanas ug mas epektibo nga mga teknolohiya ug mga gawi sa produksyon sa mais ang mga mag-uuma lakip na sa kinatibuk-ang production chain – gikan sa pag-andam sa yuta ngadto na sa value-adding.

 

Pinaagi sa paghatag sa mga local farmers og dugang kahibalo ug kahanas sa corn production ug entrepreneurship, kini nga programa dili lang magpalambo sa agricultural output makadugang usab sa economic upliftment sa Brgy. Indahag ug sa komunidad nga nagpalibot niini.

 

Ang kalihokan gitambongan sa mga key representatives sa ATI-X, APOO, ug mga barangay officials nga midayeg sa commitment ug kadasig sa mga farmer-participants. (ALR/CIO/Photos from APOO)