NAGPAHIGAYON og fogging/disinfection and syudad sulod sa Carmen market nga gipangulohan mismo nila ni Mayor Rolando `Klarex’ Uy ug Barangay Carmen Punong Barangay Raineir Joaquin ‘KapKik’ Uy, Lunes Hulyo 7, 2025.

 

Una kining higayon nga nagpahigayon sa nasangpit nga kalihokan sulod sa mercado pinaagi sa inisyatibo sa City Health Office (CHO) sa pagpangulo ni City Health Officer Dr. Rachel Delia ug sa City Economic Enterprises and Development Administration (CEEBDA) pinangulohan usab ni Acting Manager Atty. Marianne Guibone.

 

Una nang gipadayag ni Mayor Klarex atol sa flag raising ceremony nga tumong sa pagpahigayon og fogging/disinfection sa merkado nga limpyo ang gibaligya nga mga produkto ilabina ang mga karne, isda, ug uban pa aron masiguro nga walay mga ilaga, ok-ok, langaw ug uban pang mga insekto nga nikamang niini.

 

Ug mahatagan og seguridad ang katawhan nga luwas ug limpyo ang ilang mapalit nga mga produkto dugang ni Mayor Klarex.

 

Samtang gipasabot ni Dr. Dilla nga sa adlaw’ng Miyerkules sa Cogon market na usab magpahigayon sa susamang kalihokan ug isunod dayon ang Westbound Terminal and Public Market.

 

Naglaraw usab ang CHO ug CEEBDA nga magpalit og mouse trap nga ibutang sa mga natumbok nga againan sa mga ilaga.

 

Gawas sa kamerkaduhan, magpahigayon og fogging activity ang syudad sa mga pampublikong tunghaan batok dengue gani, gisugdan na kini diha sa City Central School.

 

Gipasabot ni Dra. Dilla nga kurambos tali sa syudad ug sa mga tunghaan ang himoon diin ang moabaga sa gasolina ug krudo mao ang tunghaan samtang angkonon sa syudad ang machine ug manpower.

 

Siya nidugang nga mahimo nila kini buhaton sa mga pribadong tunghaan kung mohangyo kini diin susama gihapon ang sistema sa publikong tunghaan.

 

Miabag sa maong kalihokan ang mga barangay kagawad sa Barangay Carmen ingon man kapulisan sa Carmen Police Station. (ALR/CIO/Photos by ROEL FELICITAS/JOHNEL NERI/JHOANNE ABEJO/CIO)