MIPAILAWOM sa barangay awareness drive kalabot sa pagsugpo sa Human Trafficking, Online Sexual Abuse and Exploitation of Children ug Children Sexual Abuse and Exploitation (OSAEC-CSAE) ang mga barangay officials, Barangay Council for the Protection of Children (BCPC) focal persons uban sa Violence against Women and Children (VAWC) desk officers, barangay lupon gikan sa Barangay 29, Agusan ug Barangay Lapasan adlaw’ng Huwebes, Hulyo 17, diha sa City Tourism Hall, ning siyudad.

 

Atol sa barangay awareness drive, gihisgotan ang mga kalabot sa OSAEC realities and digital threats ug protection mechanisms sa barangay level lakip mga barangay referral pathways.

 

Misalmot sa maong kalihokan sila si Committee on Social Services Chairperson City Councilor Maximo ‘Jonjon’ Rodriguez III, Committee on Women and Family Relations Chairperson City Councilor Desiree ‘Des’ Dahino, City Councilor Imee Rose Moreno ug Liga ng mga Barangay President City Councilor Marlou Tabac.

 

Ang barangay awareness drive inisyatiba sa Cagayan de Oro Justice Zone ug LGU-CDO kansang tumong ang mahatagan og lawom nga kahibalo ang mga partisipante alang sa mga ‘tips’ sa pagkunhod sa kaso sa OSAEC ning siyudad lakip ang mapadangat sa barangay level ang mga angay buhaton aron malikayan ang Human Trafficking ug OSAEC-CSAE.

 

Mahinumdoman nga ang siyudad gi-deklarar isip ika-14 Tri-City Justice zone batok Online Sexual Abuse or Exploitation on Children (OSAEC), niadtong Septiyembre 3, 2024 diha sa Cove Garden Resort, Cugman.

 

Gani, kini usa lamang sa mga lakang aron mapadayon ang imahe sa siyudad isip 14th Tri-City justice zone kon isa sa mga siyudad diin aduna’y best practices sa pagsugpo sa kaso sa OSAEC. (NLB/CIO/photos by Jhoanne Abejo/CIO)