Gihingusgan karon sa syudad ubos sa administrasyon ni Mayor Rolando `Klarex’ Uy nga mahatagan og kasulbaran ang nagpadayon nga problema sa pagbaha pinaagi sa pag-atiman sa mga creeks, partikular na ang Bitan-ag Creek.

 

Alayon niini, nagpahigayon og workshop ang Hapsay Sapa Team, pinangulohan sa Project Head Patrick Gabutina, uban sa mga stakeholders ug partner agencies, Martes, Hulyo 29, 2025, diha sa Rosario Arcade Limketkai Center.

 

Sa iyang mensahi nga gipaabot pinaagi ni Engr. Armen Cuenca, dept manager sa City Local Environment and Natural Resources Office (CLENRO), si Mayor Rolando `Klarex’ Uy naghangyo nga magtinabangay ang tanan aron makab-ot ang mga tinguha alang sa Bitan-ag Creek ug matubag ang problema sa mga creeks.

 

Gipadayag usab ni Engr. Cuenca nga gidasig ni Mayor Klarex ang katawhan nga magtanom og kahoy, ingon man hawanan ang kilid-kilid sa Bitan-ag Creek.

 

Samtang, gipanawagan ni DILG City Director Ellaine Josephine Depaur ang commitment sa mga barangay nga maoy gikinahanglan alang sa mas epektibo nga pagpatuman sa balaod. “Aside from implementing it well, there should be proper monitoring,” dugang ni Dir. Depaur.

 

Niadtong Hulyo 10, 2025, gisusi sa Hapsay Sapa Team ang kinatibuk-ang Bitan-ag Creek pinaagi sa pagbaklay gikan sa Barangay Indahag paingon sa Barangay Lapasan aron makita ang problema ug ang kahimtang sa creek.

 

Nasayran nga adunay upat ka mga problema ang ilang nakita ug kini mao ang basura, informal settlers, water maintenance, ug ang trash trap/infra.

 

Uban sa tema nga “Panaghiusa Alang sa Bitan-ag”, ang maong mga problema ang gipangitaan karon og pamaagi sa Hapsay Sapa Team, uban sa mga stakeholders ug partners nga masulbad pinaagi sa maong workshop.

 

Ang kalihokan gitambongan sa mga opisyal ug representante sa DPWH, DENR, DILG, Clenro, OBO, CHUDD, City Assessment Office, CDRRMD, Office of the Vice Mayor, World Wide Fund nga usa ka non-government organization, ug Limketkai Group.

 

Misalmot usab ang mga punong barangay sa barangay Camaman-an, Lapasan, Puntod ug Indahag, Barangays 22, 24, 26, 27 ug 36. (ALR/CIO/Photos by Reynan Baylin/CIO)