OPISYAL nang gibuksan adlaw’ng Miyerkules, Hulyo 30, ang pinakaunang Artificial Intelligence (AI) Laboratory sa tibuok nasud alang sa pampublikong tunghaan, nga nahimutang sa Dansolihon National High School, Brgy Dansolihon ning syudad.

 

Ang maong inisyatibo kabahin sa Relevant Industry Skills for Employment (RISE) program, nga nagtumong sa pagpalig-on sa technological nga kahibalo ug maayong edukasyon sa kabatan-onan.

 

Ang AI laboratory proyekto sa kagamhanang lokal ubos sa administrasyon ni Mayor Rolando 'Klarex' Uy pinaagi sa Local School Board (LSB), sa paningkamot usab sa LSB Executive Director Dr. Alicia Anghay diin aduna kini 51 computers ug Led TV alang sa pagtuon sa mga estudyante.

 

Naghatag kini og kahigayunan sa mga regular students ug ALS learners nga makakat-on sa AI connected skills.

 

Ang maong lab magamit sa data annotation, coding ug digital transformation. Ang 3D CREATION (Crafting Realistic Models for Immersive Digital Experiences) nga magtudlo sa paghimo og realistic model virtual experience.

 

Lakip usab nga matun-an ang drone assembly (technical knowledge sa paghimo og drone); drone flight simulation nga nagtugot sa mga estudyante sa pagbansay sa pagpalupad sa drone ubos sa susama sa real virtual situation.

 

Kini nga proyekto inabagan usab sa Department of Education, Skunk Works, Department of Science and Technology (DOST) ug Department of Trade and Industry (DTI) ug Technical Education and Skills Development Authority (TESDA).

 

Mitambong sa maong kalihukan ang mga sakop sa 21st city council, Nahilaran IP ug mga department heads sa city hall.

 

Kini nga proyekto nagpakita sa dakong panlantaw ni Mayor Klarex nga ang usa ang teknolohiya nga mahimong yawe sa kalampusan sa tanang kabataan, bisan pa sa ilang kahimtang sa kinabuhi.

 

Ang maong laboratory dili lamang usa ka lawak apan usa ka pultahan sa oportunidad, ug kini ang pinakaunang AI Laboratory sa tanang pampublikong tunghaan sa tibuok nasud. (MDS/CIO/Photos by: Kim Zaldivar & Jhoanne Abejo/CIO)