GISUGDAN na sa City Agriculture and Productivity Office (CAPOO) inabagan sa Department of Agriculture Region 10 ang Year 2 Elevate Agriculture Convention karong adlawa, Agosto, 19 ning tuig.

 

Kini usa ka multi-sectoral symposium ug exhibit nga naga-aghat ug nagdani sa mga local farmers ug fisherfolk ning dakbayan sa pagpatuman sa mas pinasayon ug moderno nga pamaagi sa pag-uma. Lakip usab ang pagpaabot sa mga nagkadaiyang oportunidad ug paghatag og bili sa ilang mga ginama o produkto.

 

Ang maong agriculture convention matigayon sulod sa 3 ka adlaw diha sa Cagayan de Oro City Tourism Hall ug molungtad Agosto 21 ning tuig diin hisgotan ang pagpanamom og lubi ingon man urban and organic agriculture; ug Rabbit and Free-range chicken.

 

Kini nga kahigayonan nagtigom sa mga lokal nga mag-uuma, mga stakeholders sa agrikultura, ug mga teknikal nga eksperto aron pagpaambit sa labing good practices, pagpakita sa malungtaron nga teknolohiya, ug pagdasig sa nagkalain-laing oportunidad sa panginabuhian sa tibuok rehiyon.

 

Pinaagi sa maong symposium, exhibit, ug teknikal nga tabang, gipalig-on sa CAPOO ang koneksyon tali sa kahibalo, teknolohiya, ug mga oportunidad nga makatabang sa pagpalambo sa sektor sa agrikultura ug pangisdaan. (LRM/CIO photos by Iren Fuentes/CIO)