Misanong ang konseho sa barangay Carmen, ubos sa pamunoan ni Kapitan Raineir Joaquin ‘Kikang’ Uy’, sa panawagan sa lokal nga kagamhanan ning syudad nga magtinabangay sa pagkolekta sa basura.

 

Kahinumduman nga nanawagan si Mayor Rolando ‘Klarex’ Uy sa tabang ug kooperasyon sa mga kabarangayan, ilabina kadtong mga dagkong barangay nga nahimutang sa sentrong bahin sa Cagayan de Oro nga i-mobilize ang ilang mga personahe ug garbage trucks aron mapaspasan ang paghakot sa nagdapun-og nga mga basura palibot sa syudad.

 

Sa pagkakaron, gi-deploy na ang mga open dump trucks sa City Engineering Office (CEO), City Local Environment and Natural Resources Office (CLENRO) ug City Public Services Office (CPSO), uban ang tabang ug suporta sa mga private trucks ug volunteer groups sa pagkolekta sa basura.

 

Apan, usa sa nakapalangan ug naghatag og kalisdanan karon sa paghatud sa mga basura padulong sa engineered sanitary landfill sa barangay Pagalungan ang daut ug lapokon nga dalan tungod sa pagsige og ulan karong panahona.

 

Sa pinakaulahing impormasyon, nagpadayon pa ang proseso sa re-bidding alang sa bag-ong garbage collector sa Cagayan de Oro human mihupas na ang kontrata sa Tencil, ang kanhi private garbage collector sa syudad. (CIO/photos courtesy of Kikang “Kapkik” UY FB page)