NAGPADALA na og water samples gikan sa mga establisemento ug gripo ang City Health Office ngadto sa Department of Health – Northern Mindanao (DOH-X) aron matino ang giingong kontaminasyon sa tubig dinhi sa dakbayan sa Cagayan de Oro.

 

Kini human gitaho ni City Health Officer Dr Rachel Dilla sa usa ka radio interview karong buntag (Sept. 23) nga mitala na ang CHO og 120 ka outpatient cases sa kaso sa suka ug kalibang dinhi sa syudad.

 

Hinoon, gihupay ni Dr Dilla ang kabalaka sa katawhan tungod kay ang maong datos, dili pa mahimong sumbanan nga mag-deklarar og ‘outbreak’ sa maong sakit dinhi sa dakbayan sa Cagayan de Oro.

 

Namahayag si Dr Dilla gihulatan na lang sa ilang buhatan ang resulta sa laboratory tests sa DOH 10, ug mipasalig kini nga ipahibalo gilayon sa publiko kung unsa man ang motumaw nga findings sa nahisgutang eksaminasyon.

 

Tungod niini, giaghat sa CHO katawhan nga mag-obserbar og ‘proper food and water safety practices’ samtang nagpadayon pa ang imbestigasyon tungod matud pa sa giingong pagsaka sa kaso sa suka ug kalibang. (CIO/infographic by Sean Luigi Istoso)