GITUBAG sa administrasyon ni Mayor Klarex Uy ang hangyo ni Philippine Ports Authority-Misamis Oriental/Cagayan de Oro Port Management Office port manager Fernando B. Mapalo Jr. nga matabangan ang ilang buhatan paghawan sa mga ‘obstructions’ sa Agora road nga magsumpay padulong Gate 5 sa PPA area.

 

Nasayran nga gihimo karong ‘garbage dumping ug parking area’ sa mga sakyanan, tricab, trisikad, ug kariton ang parte sa nahisgutang dalan, sanglit wala pa natibawas ang road opening project sa PPA Gate 5.

 

Laraw sa mga kadagkoan sa PPA nga tibawason ang maong road project aron ma-abrihan kini sa dili pa ang bulan sa Disyembre karong tuiga sa tuyo nga ma-decongest sa trapiko ang dalan Julio Pacana padulong sa pantalan, hinungdan nga nangayo og tabang sa syudad ang PPA alang niini nga katuyoan.

 

Kini ang sentro sa diskusyon sa usa ka coordination meeting nga gipahigayon adlaw’ng Martes, Septiyembre 30 sa PPA port office nga hiniusang gidumala ni City Administrator Atty. Roy Hilario Raagas ug PPA port manager Mapalo Jr.

 

Hinoon, mipasalig si Punong Barangay Alexis Dacer sa Puntod ug ang barangay administrator sa Lapasan nga mohimo og managlahing consultative meetings sa dili madugay aron mapasabot ang mga apektadong residente sa himoong lakang sa syudad ug PPA aron sa ingon mawala na ang mga ‘obstructions’ sa maong dalan sa dili pa kini agian sa mga sakyanan nga mosulod sa pantalan. (CIO/Infographic by Tyrone Balhon)