GITUNOL sa City Mayor’s Office ang unang hugna sa donasyon nga nakolekta sa “Tabang Kauban” alang sa mga nasunogan sa Brgy 17 kagahapong adlawa, Oktubre 6.

 

Mismo si Chief of Staff Sheila Lumbatan, uban ni Secretary to the Mayor Xysclyn Faith "Kansai" Lumbatan ang nangulo sa pag-apud-apud niini uban sa mga personahe sa City Mayor's Office ug Acting City Information Officer Jade Adeser ang nagtunol niini sa evacuation site pinaagi ni Barangay 17 Punong Barangay Anthony Atterviry.

 

Lakip sa gi-kolekta sa ‘donation drive’ ang bugas, pre-loved clothes, habul, hygiene kits, canned goods, noodles, biscuits, ready-to-go meals, flashlight, first-aid kit ug mga unlan.

 

Gani man, padayon pa ang pag-kolekta sa City Mayor's Office sa mga donasyon sa City Hall Mini Park gikan alas 8:00 sa buntag hangtud alas 8:00 sa gabii ug gihangyo nga school supplies, handheld fans, brand new underwears, tsinelas, diapers ug pagkaon para sa mga gagmay'ng bata ingon man kini ang ilang nakita nga kakulangon sa mga apektadong pamilya.

 

Sa kasamtangan, mikabat na sa 279 ang na-apektohan sa sunog sumala sa City Social Welfare and Development Department (CSWD).

 

Padayong naningkamot si Mayor Klarex Uy nga mahatagan ang mga nasunogan sa Barangay 17 og ayuda gikan sa siyudad pinaagi sa CSWD uban sa tabang sa City Disaster Risk Reduction Management Department ug City Mayor's Office. (NLB/CIO/photos courtesy of Jhoanne Abejo/CIO and photos courtesy of CMO)