SA tinguha nga makatabang sa palero ug maluwas sa posibleng sakit, gitunol sa Cagayan de Oro City Hospital- Lumbia ang 1,500 ka Personal Protective Equipment (PPEs) sa mga garbage collectors adlaw’ng Martes, Octukbre 14 ning tuig didto mismo sa sanitary landfill sa Brgy Pagalungan. Ang maong inisyatiba gipangulohan ni Dr. Ferdie Miranda, Acting Chief of Hospital sa City Hospital-Lumbia uban sa hospital staffs ubos sa administrasyon ni Mayor Rolando “Klarex” Uy. Matag palero nakadawat og 10 ka PPE nga naglakip sa googles, face shield, cover all dress, ug apron. Gihatagan usab sila og 1-month supply sa multivitamins ingon man multivitamins syrup para sa ilang mga anak. Kini nga programa gihimo aron maprotektahan ang mga palero batok sa mga posibleng sakit ug impeksyon nga makuha sa ilang trabaho. Nasayran nga ang maong PPE gipanghatag gikan sa Department of Health (DOH) panahon iadtong COVID-19 nga wala pa nagamit. Matod ni Dr. Miranda, kini nga inisyatiba agig pagsuporta sa paningkamot ni Mayor Klarex sa pagsulbad sa problema sa basura ug ang pag-atiman usab sa ilang panlawas aron malikay sa kontaminasyon. (DYM/Photos by Roel Felicitas/CIO)