MALAUMON si Mayor Klarex Uy nga masulbad na ang problema sa basura sa dili pa matapos ang duha ka semana nga ‘ultimatum’ nga iyang gihatag sa mga gitahasan sa paghakot ug paglimpyo sa syudad lakip ang bag-ong garbage collector nga Standard Systems Water and Wastewater Technologies. Inc ug key departments sa city hall.

 

Kini human nga mismong si Mayor Klarex kauban ang Clenro Acting Department Manager Elvisa Mabelin ang nangulo sa pag-monitor sa massive deployment duha ka gabii na ang milabay.

 

Gisiguro gayud ni Mayor Klarex nga makita ang mga lugar diin nagtapun-og ang basura ug ang katakus sa mga gitahasan sa paghinlo niini.

 

Subay niini, gimandoan usab ni Liga ng Barangay President Councilor Marlo Tabac ang mga tanod sa kabarangayan sa pagbantay ug pag-monitor sa mga lugar nga sarang galabayan og basura sa katawhan.

 

Nanghinaut si Mayor Klarex ingon man ang Clenro nga masustiner kini nga paningkamot ingon man ang kooperasyon sa katawhan sa mga paningkamot sa syudad. (ACM/Photos by Rod Constantino/CIO)