GITUGOTAN ug gi-deputize na ang mga punong barangay sa pag-issue og Ordinance Violation Receipt (OVR) sa mga masapon nga maglabay og basura sa dili gitakda nga schedule sa ilang barangay.

 

Kini human nakigtagbo si Mayor Klarex Uy sa mga kapitanes adlaw’ng Miyerkules, Oktubre 15, aron pagpahinumdom kanila ug paghangyo sa suporta, kooperasyon ug responsibilidad pinasubay sa Republic Act 9003 o Ecological Solid Act of 2000.

 

Sa maong panagtigom gipasabot sa mayor, kauban ang Task Force Basura, sa mahinungdanong papel ug responsibilidad sa barangay sa pagmentinar sa kahinlo sa ilang tugkaran ug ang pagsunod sa saktong oras sa paglabay sa basura.

 

Gani man, una nang gipasalig ni Liga ng Barangay President Councilor Marlo Tabac nga iplastar sa matag barangay ang ilang mga tanod aron malikayan ang illegal dumping ilabina human mahakot ang mga basura. (ACM/Photos by ROEL FELICITAS & IREN FUENTES/CIO)