Usa ka dakong kompanya ang nagpadayag og kaikag nga mobubo og puhunan sa natad sa modern traffic system ug closed-circuit television (CCTV) surveillance dinhi sa dakbayan sa Cagayan de Oro.

 

Ang Davao City-based traffic engineering company, M3P Builders Company, nga gipangulohan nila ni Engr. Michael Jr A. Masipag, General Manager; ug Engr. Markbenson O. Pacatang, Operations Manager mipresentar sa ilang project proposal atubangan sa mga kadagkoan sa Roads and Traffic Administration (RTA), City Engineering Office (CEO), City Information Office (CIO), City Planning and Development Office (CPDO) ug City Disaster Risk Reduction and Management Department (CDRRMD), Miyerkules, Oktubre 15, 2025 diha sa City Mayor’s Office conference room.

 

Ang maong kompanya aduna nay kasinatian ug kapas sa traffic signalization and CCTV surveillance systems, diin pipila niini gipatuman sa mga progresibong syudad sama sa Makati Central Business District, Davao City, Valencia City, Bukidnon ug uban pa.

 

Gilauman nga makigtagbo sa dili madugay ang mga tigdumala sa nahisgutang kompanya kang Mayor Rolando `Klarex’ Uy aron pormal nga i-presentar ang ilang gisugyot nga proyekto. (ALR/CIO/Photos by Roel Felicitas/CIO)