MAPAHIMUSLAN na sa publiko ang Animal Bite Treatment Center (ABTC) sa Cagayan de Oro City Hospital – Lumbia human kini opisyal nga gibuksan, Miyerkules, Oktubre 22, ubos sa pagpangulo ni Mayor Rolando “Klarex” Uy.

 

Nasayran nga dugay na natukod ang maong pasilidad apan wala pa kini maablihan kaniadto tungod sa kakulang sa mga gamit. Karon nga kompleto na ug andam na sa operasyon, gipahigayon ang grand opening ceremony nga gisugdan sa blessing ug ribbon-cutting.

 

Gisalmotan ang maong kalihokan ni City Councilor “Jing” Daba; mga opisyal sa Department of Health (DOH); Dr. Geneen Macadaig, Acting Chief of Hospital sa JR Borja General Hospital – Tablon, ug City Health Officer Dr. Rachel Dilla.

 

Matud pa ni Dr. Ferdinand Miranda, Acting Chief of Hospital sa CDOCH-Lumbia, ang center nagtanyag of libreng serbisyo para sa tanan nga mapaakan sa mga hayop.

 

Ang ABTC accredited sa DOH ug PhilHealth aron masiguro ang kalidad sa serbisyo ug gipatuman kini uban sa pakigtambayayong sa City Veterinary Office. Bukas kini gikan alas 8 sa buntag hangtod alas 4 sa hapon, matag Lunes, Martes, Huwebes, ug Biyernes, samtang walay schedule o vaccination matag Miyerkules, Sabado ug Domingo.

 

Pinaagi sa ABTC, ang mga pasyente makadawat og anti-rabies vaccine, wound cleaning, ug medical consultation aron mapugngan ang rabies, diin kini usa ka seryosong sakit nga makamatay kung dili matambalan dayon. (DYM | Photo by Reynan Baylin/CIO)