MALAUMON ang kagamhanang lokal pinaagi sa City Local Environment and Natural Resources Office (Clenro) kauban ang Task Force Basura nga mahibalik na sa normal ang collection ug masulbad na ang nagtapun-og nga basura sa dili pa matapos ang ultimatum nga gihatag ni Mayor Klarex Uy sa grupo.

 

Kini human nga gihatagan sa Department of Environment and Natural Resources – Environmental Management Bureau 10 (DENR-EMB 10) og grado nga 7 (10 ang pinakataas) ang paningkamot ug pag-rehabilitate sa Clenro kauban ang City Engineering Office sa engineered sanitary landfill sa Brgy Pagalungan human kini napasagdan sa kanhi private garbage collector.

 

Sa pagbisita ni Regional Director Reynaldo Digamo sa EMB 10 karong buntag, (Miyerkules, Oktubre 22) ug mismo si Mayor Klarex kauban ang Task Force Force Basura ug mga media personalities, personal nila nga nasaksihan ang dakong kalamboan agig tubag usab sa show cause order nga una nang gi-issue sa EMB 10 tungod sa mga kalapasan sa operation and maintenance sa sanitary landfill.

 

Matud ni Digamo, natubag sa syudad ang mga violations ug kompyansa kini nga mamentinar na ang sakto nga pagpadagan sa sanitary landfill.

 

Hinuon, gipasabot usab ni Digamo nga wala pay LGU nga nakaangkon og “perfect score nga 10” sa pagpadagan og landfill sa tibuok rehiyon ingon man sa nasud.

 

Subay niini, naghangyo si Mayor Klarex sa kooperasyon sa tanan ilabina ang barangay ug ang komunidad sa pagsunod sa RA 9003 aron mapadayon ug masulbad na ang problema sa nagtapun-og nga basura pinaagi usab sa paningkamot sa syudad. (ACM/photos by Kim Zaldivar/CIO)