GIHAGIT ni DENR-EMB 10 Regional Director Reynaldo Digamo ang mga opisyales sa barangay ingon man ang komunidad sa pagpatuman sa istrikto nga ‘waste segregation at source’ ug ‘segregated waste collection’ pinasubay sa RA 9003 aron makab-ot ug mamentinar ang kahinlo sa syudad.

 

Matud ni Digamo dako og kaakohan ang barangay ug komunidad sa pagsulbad sa problema sa basura ilabina nga gihimo na sa syudad, pinaagi sa City Local Environment and Natural Resources Office (CLENRO) ug Task Force Basura ingon man ang Standard Systems Water and Waste Water Technologies, ang paghakot sa mga nagtapun-og nga basura tungod sa kakulangon sa kanhi garbage collector.

 

“Basura is everybody’s business and everybody is part of the problem as well as the solution,” butyag ni Digamo atol sa pagbisita sa Pagalungan Engineered Sanitary Landfill ug press conference adlaw’ng Miyerkules, Oktubre 22.

 

Gibutyag usab ni Acting CLENRO Department Manager Elvisa Mabelin nga mahinungdanon ang pagsunod sa Reduce, Reuse ug Recycle sa pagpakunhod sa basura sanglit basi sa ilang pagtuon, matag tawo maka-generate og 0.58kg/day/capita nga basura kung dili kini mapatuman.

 

Kahinumdoman nga mibisita usab sa sanitary landfill si Mayor Klarex Uy kauban si Director Digamo ug mga personahe sa DENR-EMB 10 lakip sakop sa media ug task Force Basura, Oktubre 22, aron personal nga mosaksi sa kahimtang sa landfill.

 

Subay niini, mapasalamaton usab si Mayor Klarex sa paningkamot sa TF Basura nga mitubag ang maong suliran. (ACM/Photos by Kim Zaldivar/CIO)