MILAGDA og 'Memorandum of Understanding' kon MOU ang syudad sa pagpangulo ni City Mayor Rolando 'Klarex' Uy, Department of the Interior and Local Government - CDO, Liga ng mga Barangay, City Prosecutors Office, Integrated Bar of the Philippines - Misamis Oriental Chapter, Liceo University ug Xavier University, alang sa pagpakusog ug pagpalig-on sa Lupong Tagapamaya sa 80 ka barangay sa dakbayan, adlaw'ng Byernes, Oktubre 24, 2025 diha sa City Tourism Hall.

 

Subay sa MOU nga nag-ulohan "Strengthening Local Governance: Building Stronger and Advancing Knowledge of the Lupong Tagapamayapa in the Implementation of Katarungang Pambarangay in Cagayan de Oro", gipalig-on ang kolaborasyon sa ahensya sa gobyerno, law profession ug academe sa pagpatunhay sa barangay justice system, pagbansay sa kahanas sa mga Lupon diha sa mediation, conciliation ug dispute settlement ug pagbaton sa Barangay Lupon Case Management & Notification System.

 

Mismo si Mayor Klarex ang milagda sa maong MOU, kauban si DILG CDO City Director Ellaine Josephine B. Depaur, Liga ng mga Barangay President City Councilor Marlo L. Tabac, City Prosecutor Charisse Galarrita -Bitoon, IBP- MisOr President Atty. Gregorio Miguel Pallugna, Liceo University President Dr. Alain P . Golez nga representahan ni Ret. Judge Dean Gil G. Bollozos, ug Xavier University President Fr. Mars Tan nga girepresentahan ni Associate Dean Atty. Ernesto Neri.

 

Gipadangat ni Mayor Klarex ang hugtanong suporta sa Lupong Tagapamaya sanglit dakong tampo ang barangay justice system sa kinatibuk-ang pagpalig-on sa kahapsay ug kalinaw sa dakbayan.

 

Nagpadayag usab sa ilang suporta sa maong katuyuan sila si Councilor George Christopher Goking ug Councilor Paolo Nicolo Gaane. (AGP/ Photos by Iren Fuentes/CIO)