NAGMALAMPUSON si Ruelle Canino, usa sa mga representante sa Cagayan de Oro City, human nasungkit ang kampeonato sa Batang Pinoy 2025 Standard Game nga gipahigayon sa Robinsons General Santos.

 

Girepresentar ni Canino ang Team CDO Chess ug gipakita ang iyang kadasig, kahanas, ug disiplina sa dula nga naghatag dungog ug garbo sa dakbayan.

 

Ang iyang kalampusan nagpakita sa kusganong paglambo sa laraw sa chess sa Cagayan de Oro ug sa potensyal sa mga batan-onang atleta sa syudad.

 

Ang matag grupo ug indibidwal nga midula sa Batang Pinoy 2025 gisuportahan sa kagamhanang lokal pinangulohan ni Mayor Rolando 'Klarex' Uy pinaagi sa City Sports Office nga gipangulohan ni Alby Cris Waga, uban ang mga coaches ug staff sa maong opisina.

 

Ang ilang padayon nga pagiya ug pag-amuma sa mga atleta maoy hinungdan sa kalampusan sa Team CDO Chess ug sa pagdasig sa mga kabatan-onan nga magpadayon sa ilang mga damgo sa kalibotan sa sports. (MDS/CIO/Photos Courtesy to City Sports)