ACTIVATED na sugod Oktubre 30 hangtod Nobyembre 2 ang City Disaster Risk Reduction and Management Council – Incident Management Team alang sa pagsiguro nga luwas ug malinawon ang mga kalihokan pagtamod sa ‘Kalag-Kalag 2025’ sa tanang pampubliko ug pribadong sam-ang sa Cagayan de Oro.

 

Laraw sa IMT nga magamit ang mga personahe ug rekurso sa nagkadaiyang ahensya sa gobyerno ug mga volunteer groups alang sa malangkubon nga paghatag seguridad sa publiko ug mga responders, pagpatuman sa mga nalatid nga gabayan subay Executive Order 0415-2025 A nga gilagdaan ni Mayor Rolando ‘Klarex’ Uy, pagplastar sa temporaryong mga traffic scheme, ug pagbantay sa mga kabtangan sa syudad.

 

Ang IMT gipangulohan ni CDRRMD chief Nick Jabagat, kauban ang mga personahe sa CDRRMD, City Information Office, City Health Office, City Local Environment and Natural Resources Office, JR Borja General Hospital, Roads and Traffic Administration, mga nasudnong ahensya pinaagi sa Cagayan de Oro City Police Office, Bureau of Fire Protection, Taskforce Oro, Philippine Coast Guard, ug mga volunteer groups pinaagi sa barangay Tanod, force multipliers, CLIMBS, Gloc 215, Red Cross, CAREST, ug ARON.

 

Magpahigayon usab ang tinugyanan sa Regulatory Compliance Board og monitoring sa mga malapason sa mga gabayan nga gipatuman sa syudad, ingonman ang pag-issue og ‘ordinance violation receipt’ (OVRs) kung gikinahanglan.

 

Sa laing bahin ipakatag ugma'ng adlawa Nobyembre 1 ug 2 sa IMT- medical team ang tagsa ka mga first aid station sa entrada nga bahin diha sa Oro Gardens Memorial Park, CDO Chinese cemetery, Golden Haven Memorial Park ug Divine Shepherd Memorial Park.

 

Samtang duha ka first aid station usab diha sa entrada nga bahin ug sa simbahan diha sa City Memorial Park (Bolonsori) ug Eternal Gardens Memorial Park aron gilayong mahatagan og pagtagad ang kinsa mang nagkinahanglan sa atensyong-medikal. (AGP/Photos by Reynan Baylin, Jhoanne Abejo & CDRRMD)