NAGKADAIYANG pagpangandam ang gihimo karon sa pipila ka mga Barangay Disaster Risk Reduction and Management Committee sa Cagayan de Oro batok sa posibleng peligrong epekto sa gibantayan nga Bagyong Tino nga gikabalak-ang modagpak sa kayutaan sa Eastern Samar, Southern Leyte ug Dinagat Islands unyang gabii o ugma sa buntag, Nobyembre 4, 2025.

 

Nakaposisyon na ang mga kahimanan sa rescue, mga sakyanan, pagmuntar sa command centers, hugot nga monitoring sa mga kasubaan ug kabaybayonan ingon man mga kalihokan sa pagpahibalo sa katawhan sama sa pag-rekorida aron malikayan o makunhoran ang kadaot sa pag-igo sa bagyo.

 

Samtang pipila ka pamilya na usab nga nagpuyo duol sa suba sa Zone 7 Tambo, Barangay Bulua ang nagpahigayon og 'pre-emptive evacuation'.

 

Padayong gi-abisohan ang katawhan ilabina ang nanimuyo duol sa suba ug kabaybayonan nga mag-monitor sa lakat sa panahon ug motuman sa mga pahimangno. (AGP/Photos by Reynan Baylin & Kim Zaldivar/CIO)