PORMAL nang gibuksan sa City Agricultural Productivity Operations Office kon CAPOO ang Klarex nga Merkado sa Baryo (KMB), adlawng Biyernes, Nobyembre 28. Kini ang localized program ni Mayor Klarex Uy alang sa paghatag og mas barato nga produkto sa mga konsumante gikan mismo sa mga mag-uuma.

 

Kini usa ka konsepto aron pagpadasig sa mga local farmers sa pagahin kanila ug “direct avenue” sa pagbaligya sa ilang produkto ngadto sa “target consumers”, ingon man sa pagwagtang sa systemang middleman, lakip usab ang pagpalig-on sa kita sa mag-uuma alang sa kalamboan sa komunidad ug sektor sa agrikultura.

 

Mitambong sa official launching ug hauling truck blessing si Aralicia Bolisig, nga mirepresentantar ni Mayor Klarex, diin gipaabot ang hugot ug kanunay nga suporta sa lokal nga kagamhanan ngadto sa mag-uuma ug mangigisda sa siyudad.

 

Lakip sa mitambong si 21st City Councilor Juancho Pascual, Chairman sa Committee on Agriculture, diin siya nagpaambit sa kamahinungdanon sa Klarex nga Merkado sa Baryo isip usa ka plataporma nga naghatag og direkta nga benepisyo sa mga mag-uuma ug konsumidor.

 

Sentro usab sa mensahe ni City Agriculturist Engr. Bernie Daba Jr. ang padayon nga suporta sa sektor sa agrikultura ug ang papel sa merkado sa pagpalig-on sa lokal nga produksyon.

 

Samtang dungan sa maong kalihukan usab ang pagtunol sa bag-ong hauling truck nga magsilbi isip logistic support sa mga nagkadaiyang farmer association ning siyudad.

 

Misalmot sa official launching sa KMB ang Masigasig Association, Buhat Pahida Pig Sabuwahan Hu Bahe Ta Besigan, BUPAPIBBA, CAFAMCO, Fisherfolk of Agusan Aquatic Agriculture Cooperative, ug Mushroom Grower gikan Brgy. Macasandig nga si Mr. Julius Alvarez.

 

Duyog usab sa maong kalihokan ang Department of Agriculture RFO-X, BFAR Region 10, ug DTI-Misamis Oriental.

 

Ang Klarex nga Merkado sa Baryo anaa sa matag Klarex nga Serbisyo sa Baryo ni Mayor Klarex ug scheduled locations nga naglangkob sa Camella Homes Uptown, Villa Ernesto Gusa, San Augustine Valley Homes, Pueblo de Oro, Gran Europa, ug Cogon Public Market.

 

Mapalit dinhi ang mga lagutmon, talamnon, processed goods, ug uban pa.

 

Tinguha sa Klarex nga Merkado sa Baryo nga maghatag og dugang oportunidad ug kahigayonan nga mapalambo ang ilang panginabuhian ingon man maghatag og dugang kadasig sa mag-uuma ning dakbayan. (LRM/video by Roel Felicitas/ photos by Iren Fuentes/CIO/ as edited by Tyrone Balhon/CIO)