MIDUYOG ang kagamhanang lokal, pinaagi sa City Health Office ubos sa pagpanguna ni Dr. Rachel Dilla, sa gihimong World AIDS Day 2025, adlaw’ng Biyernes, Disyembre 5 ning syudad.

 

Ang selebrasyon nga nagdala sa tema’ng 'Overcoming Disruption, Transforming the AIDS Response,' nagtinguha nga matabangan ang matag tawo nga adunay AIDS aron makab-ot ang kadaugan sa mga hagit nga ilang giatubang sa ilang kinabuhi.

 

Kini nga kalihokan gipahigayon inabagan sa Department of Health (DOH), City Health Office (CHO), K-Plus Incorporated, NORMAA CARES, ug Cagayan de Oro City AIDS Council.

 

Si Councilor Paolo Nicolo Gaane, Chairperson sa Cagayan de Oro City AIDS Council, mipasiugda sa pag-institutionalize sa RA 11166, nga nailhan usab nga Philippine HIV and AIDS Policy Act.

 

Kini nga balaod naglatid sa lig-on nga pamaagi sa pagpugong, pagtambal, pag-atiman, ug paghatag og suporta alang sa mga apektado sa HIV ug AIDS.

 

Ilawom sa balaod, gi-reconstitute usab ang Cagayan de Oro City AIDS Council (CDOAC) ug gipasiugdahan ang pag-integrate sa HIV education ug care sa Universal Health Care program, pinaagi sa ordinansa nga gimugna ubos sa pagpangulo ni Konsehal Gaane isip Chair sa Committee on Health.

 

Ang maong kalihokan nagpamatuod sa dakong suporta sa syudad alang sa mga tawo nga nagpuyo uban niining sakit, ug nagpakita sa padayon nilang paningkamot sa pagtabang kanila nga masulbad ang suliran nga ilang giatubang. (MDS/Photos by: Reynan Baylin/CIO)