NAKIGTAGBO si Mayor Klarex Uy sa mga kadagkoan ug personahe sa Roads and Traffic Administration (RTA) adlaw’ng Domingo, Disyembre 21, alang sa pagtuki sa mga kalamboan sa trapiko ingon man pagpaminaw kanila aron matubag ug masulosyonan ang problema sa trapiko.

 

Kini human mismo si Mayor Klarex ang mihimo sa pagsuroy ug pagpaniid sa trapiko sa syudad diin iyang nakita ang kakulangon sa pagkamatinud-anon sa pipila ka mga traffic enforcers ug pipila kanila wala nagpakabana ug dili seryoso sa ilang katungdanan diha sa kadalanan sama na lamang sa mga ‘unmanned posts’, non-functional traffic lights ug walay pagtagad sa ilang responsibilidad.

 

Apan bisan pa man niini, gipadayag usab ni Mayor Klarex ang iyang pagtahod sa mga traffic enforcers ug sayod siya sa risgo sa ilang trabaho busa iyang giaghat nga mag-mainampoon alang sa pagpangayo og giya, kadasig sa pagtuman sa kaakohan ug proteksyon gikan sa Labaw’ng Makagagahum.

 

“Mas maayo pa nga mouli nga gikapoy gikan trabaho, kaysa mouli kay gikapoy gikan nangitag trabaho. Naghangyo ko, tabangi ko ninyo nga masulbad ang problema sa trapiko” saysay ni Mayor Klarex.

 

Samtang, gitunol usab ni Mayor Klarex ang 250 ka radyo ug reflector vests sa mga traffic enforcers aron magamit nila diha sa kadalanan.

 

Mitambong usab sa maong panagtigom si Acting Department Manager Engr. Nonito Oclarit, kauban ang RTA consultants. (CIO/ Photos by Jhoane Abejo/CIO)