Ubay-ubay ka mga sidewalk ug ambulant vendors diha sa Cogon market ang gipangsita sa mga personahi sa Roads and Traffic Administration (RTA) ug nakuhaan sa ilang mga baligya tungod sa ilang pagsupak sa balaod trapiko ug ordinansa sa syudad.

 

Nagpatuman sa balaod trapiko ug pagmonitor sa kadalanan ilabina sa Cogon market area ang RTA pinangulohan ni Dept. Manager Engr. Nonito Oclarit aron maminosan ang pagkabara ug paghinay sa dagan sa trapiko sa maong lugar.

 

Diin usa sa mga hinungdan mao ang mga sidewalk ug ambulant vendors nga mi-okupar na sa pipila ka mga dalan, gani ang uban nagbutang pa og tent.

 

Tungod niini, ubay-ubay kanila ang nakuhaan sa ilang baligya ug gikuha usab ang ilang mga tent ug uban pa nga gibutangan sa ilang mga produkto.

 

Samtang, ubay-ubay usab nga mga nanag-iya ug nag-drive og sakyanan, ingon man motor nga nag-illegal parking ang giisyuhan og citation ticket.

 

Gipasabot ni Engr. Oclarit nga ang pag-okupar sa mga sidewalk ug ambulant vendors sa wala gitugot nga lugar diin nagbutang og tent ug stall naghatag og peligro sa pedestrian ug paghuot sa dagan sa trapiko.

 

Alayon niini, subling nagpahimangno ang kadagkuan sa RTA ug naghangyo sa mga vendors nga sundon ang mga gabayan nga gitakda sa Night Market Management Committee ilabina ang oras nga gitugot diha sa ilang pagpamaligya ug sa mga lugar nga gitugot kanila. (ALR/CIO/Photos from RTA)