Ang pagpaambit sa grasya ug pagpakabana sa isigkatawo ang tema ni City Mayor Rolando “Klarex” Uy sa iyang tinuig nga gift-giving activity pinaagi sa pagpanghatag og lima ka kilong bugas sa mga pasyente sa duha ka pampublikong balay-tambalanan ug usa ka caring center for children with leukemia.

 

Karong adlawa (Disyembre 22), gipangulohan mismo ni Mayor Klarex ang pagpanghatag ug pag-apud-apod sa 100 ka sako nga lima ka kilong bugas sa JR Borja General Hospital–Tablon, samtang 150 ka sako usab nga lima ka kilong bugas alang sa CDO City Hospital–Lumbia.

 

Dugang pa niini, mipaambit usab og grasya si Mayor Klarex sa mga miyembro sa Leukemia Parents ug Patients Organization (LEUPAPO) Incorporated, diin naghatag usab siya og 150 ka sako usab nga lima ka kilong bugas sa maong mga pasyente ug ilang pamilya.

 

Mapasalamaton ang mga benepisyaryo nga nakadawat sa maong pinaskohan sa mayor isip kabahin sa iyang paningkamot nga mapabati ang diwa sa pasko ning panahon sa paghinatagay.

 

Ang maong kalihokan gitambongan ni Dr. Geenen Macadaeg, Acting Chief of Hospital sa JR Borja General Hospital–Tablon; Dr. Ferdinand Miranda, Acting Chief of Hospital sa CDO City Hospital–Lumbia; City Mayor’s Chief of Staff Sheila Lumbatan; Office of the City Human Resource Management Officer Xsyclyn Faith “Kansai” Lumbatan; ug pipila ka mga department managers sa City Hall. (DYM/CIO/Photos by Jhoanne Abejo and Reels by Roel Felicitas/CIO)